ارنا کے نامہ نگار کی رپورٹ کے مطابق، صاحبزادہ ابوالخیر محمد زبیر کی سربراہی میں ملی یکجہتی کونسل کے قائدین کی مشترکہ کانفرنس آج اسلام آباد میں منعقد ہوئی۔
اس موقع پر قومی یکجہتی کونسل کے چیئرمین صاحبزادہ ابوالخیر محمد زبیر، جماعت اسلامی کے امیر لیاقت بلوچ، شیعہ علماء کونسل کے سیکریٹری جنرل علامہ عارف حسین واحدی، مجلس وحدت مسلمین کے سیکریٹری جنرل ناصر شیرازی اور جماعت اہل حدیث کے رہنما ضیاء اللہ شاہ نے خطاب کیا۔
مقررین نے غزہ کی تازہ ترین پیش رفت، فلسطین کے المناک مسائل کے حل میں عالم اسلام کے حکمرانوں کے کردار، ایران کے شہید صدر کے ہیلی کاپٹر کے حادثے، اسلامی جمہوریہ ایران اور افغانستان کے ساتھ پاکستان کے تعلقات پر بھی بات کی۔
انہوں نے شہید صدر سید ابراہیم رئیسی، شہید وزیر خارجہ حسین امیرعبداللہیان اور ان کے ہمراہ وفد کی شہادت پر ایران کی عوام اور حکومت کے ساتھ ہمدردی اور یکجہتی کا اظہار کرتے ہوئے اس بات پر زور دیا کہ ہر پاکستانی اس اندوہناک حادثے سے متاثر ہے کیرنکہ وہ اسلامی دنیا کے بہترین افراد تھے اور ہمارے لیے اس حادثے پر یقین کرنا بہت مشکل ہے۔
لیاقت بلوچ نے کہا کہ ہم ایرانی قوم کے دکھ درد میں شریک ہیں۔ انکا کہنا تھا کہ ہم شہید صدر رئیسی کے پاکستان کے کامیاب اور بے مثال دورے اور اسلام آباد، لاہور اور کراچی میں ان کی موجودگی کو کیسے بھول سکتے ہیں۔
انہوں نے کہا کہ ہم خطے میں تعاون کے لیے شہید رئیسی اور امیر عبداللہیان کی مضبوط اور متحد کرنے والی ڈپلومیسی کے مرہون منت ہیں۔ مشترکہ سرحد پر کچھ ناگوار واقعات کے بعد شہید ایرانی وزیر خارجہ کا اسلام آباد کا اہم دورہ اس پڑوسی ملک کے پاکستان کے ساتھ تعلقات کو مضبوط بنانے کے عزم کا عندیہ تھا اور دونوں ممالک کی سفارت کاری کی روشنی میں شہید رئیسی نے پاکستان کا سرکاری دورہ کیا۔
انہوں نے کہا کہ پاکستان توانائی کے بحران کا شکار ہے اور اس چیلنج کا طویل مدتی، محفوظ اور سستا حل ایران کے ساتھ ہمارے گیس پائپ لائن منصوبے پر عمل درآمد ہے۔
صاحبزادہ ابوالخیر زبیر نے کہا کہ فلسطین کے دفاع میں اسلامی جمہوریہ ایران اور شہید رئیسی جیسی شخصیت کا کردار لائق تحسین ہے جبکہ بدقسمتی سے عالم اسلام کے دیگر حکمرانوں نے مسئلہ فلسطین اور غزہ کے حوالے سے غیر سنجیدگی سے کام لیا۔
انہوں نے پاکستان تک ایران گیس پائپ لائن منصوبے کے نفاذ کا مطالبہ کرتے ہوئے کہا کہ کابل اور تہران کے ساتھ تعلقات کی مضبوطی سے اسلام آباد کو فائدہ ہوگا۔
صاحبزادہ ابوالخیر زبیر نے خبردار کیا کہ ہمارے مشترکہ دشمن امریکہ اور اسرائیل کے ایجنٹ مشترکہ سرحدوں کو غلط استعمال کرتے ہوئے اور دہشت گردی کی گھناؤنی کارروائیوں کے ذریعے پڑوسیوں کے درمیان اختلافات پیدا کرنے کی کوشش کرتے ہیں۔
ضیاء اللہ شاہ بخاری نے ایران میں ہیلی کاپٹر حادثے میں شہید ہونے والوں کو خراج عقیدت پیش کیا اور کہا کہ فلسطین اور مزاحمتی گروہوں کی حمایت میں شہید صدر رئیسی کا مضبوط مؤقف مظلوموں کی حمایت میں بے مثال تھا۔
رپورٹ کے مطابق شہید صدررئیسی اور ان کے ہمراہ وفد کی شہادت کے آٹھویں روز پاکستان کے مختلف شہروں میں مختلف گروہوں اور انقلاب اسلامی کے چاہنے والوں کی جانب سے شہدائے خدمت کی یاد میں تعزیت کے پروگراموں کا انعقاد کیا جا رہا ہے۔
حکومت پاکستان نے اسلامی جمہوریہ ایران کے صدر اور ان کے وفد کی شہادت کے سوگ میں 21 مئی بروز منگل قومی سوگ کا اعلان کیا تھا۔
جبکہ اسلام آباد اور چاروں صوبوں کے دارالحکومتوں میں پاکستان کا پرچم سرنگوں کر دیا گیا۔
آپ کا تبصرہ