تفصیلات کے مطابق پاکستانی صدر مملکت ڈاکٹر "عارف علوی" اور وزیراعظم "عمران خان" نے یوم عاشور کے موقع پر قوم کے نام الگ الگ پیغامات میں کہا ہے کہ یہ دن ہمیں شہدائے کربلا کی عظیم قربانیوں کی یاد دلاتا ہے۔
ڈاکٹر عارف علوی نے اپنے پیغام میں کہا کہ حضرت امام حسینؓ نے شہادت پاکر تاریخ اسلام میں اس دن کو قیامت تک کے لیے خاص بنا دیا۔ باطل قوتوں کا مقابلہ کرنے کے لیے جان کا نذرانہ پیش کرنے سے دریغ نہیں کرنا چاہیے۔
پاکستانی صدر مملکت کا کہنا تھا کہ شہادت امام حسینؓ درحقیقت حق کی فتح اور ظالم کیخلاف ڈٹ جانے اور ایثار وقربانی کا استعارہ ہے۔
ان کا کہنا تھا کہ محرم الحرام بڑی آزمائش کا مقابلہ کرنے کا جذبہ صادق عطا کرتا ہے۔ دعا ہے یہ اسلامی سال پاکستان کی ترقی و خوشحالی کا سال ثابت ہو۔
پاکستانی وزیراعظم عمران خان 10 محرم کے دن پاکستانی قوم کے نام اپنے خصوصی پیغام میں کہا کہ مسلمان حضرت امام حسینؓ کی لازوال قربانی کی یاد تازہ کررہے ہیں، تاریخ اسلام میں آج کے دن کو خاص اہمیت حاصل ہے۔
ان کا کہنا تھا کہ واقعہ کربلا کی بدولت آج کے دن کی خاص اہمیت ہے، کسی بھی قربانی کو راہ خدا میں نچھاور کرنا ہی عزیمت اور کامیابی ہے۔
عمران خان نے کہا کہ جذبہ شبیریؓ مسلمانوں کے ایمان و یقین کو جلا بخشتا ہے، ہم وطن عزیز اور اقوام عالم میں قابل ذکر کردار ادا کر سکتے ہیں۔
اس کے علاہ پاکستان قومی اسمبلی کے اسپیکر "اسد قیصر" اور ڈپٹی اسپیکر "قاسم خان سوری" نے یوم عاشور کے موقع پر قوم کے نام اپنے پیغامات میں کہا ہے کہ واقعہ کربلا اللہ تعالیٰ اور یوم آخرت پرغیر متزلزل ایمان، بے مثال تقویٰ، بہادری، اللہ کی راہ میں صبر اور قرآن مجید میں بیان شہادت کے جذبے کا ایک بہترین نمونہ ہے جسے قیامت تک یاد رکھا جائے گا۔
پاکستانی اسپیکر نے کہا کہ واقع کربلا ہمیں حضرت امام حسین ؓ اور ان کی ساتھیوں کی ان عظیم قربانیوں کی یاد دلاتا ہے جو انہوں نے حق اور سچ کی خاطر دیں۔
انہوں نے کہا کہ حضرت امام حسین ؓ اور ان کے ساتھی قرآنی تعلیمات، برداشت، قربانی اور جذبہ شہادت کی ایک لازوال مثال ہیں۔
اسپیکر نے کہا کہ بحیثیت مسلمان یہ ہماری اجتماعی ذمہ داری ہے کہ ہم ان طاغوتی قوتوں کے سامنے ڈٹ کر کھڑے ہو جائیں جو اپنے مذموم مقاصد کے حصول کے لیے معاشرے میں انتشار پھیلارہی ہیں۔
**9467
ہمیں اس ٹوئٹر لینک پر فالو کیجئے. IrnaUrdu@
آپ کا تبصرہ