ارنا نے سپاہ نیوی کے شعبہ رابطہ عامہ کے حوالے سے رپورٹ دی ہے کہ پاسداران انقلاب اسلامی کے کمانڈر انچیف جنرل حسین سلامی نے سنیچر کی شام سپاہ نیوی کے کروز میزائلوں کے ایک زیر زمین شہر کا معائنہ کیا۔
اس موقع پر سپاہ نیوی کے کمانڈر ایڈمیرل علی رضا تنگسیری نے کہا کہ ہم نے رہبر انقلاب اسلامی کے فرمان پر انقلاب اسلامی کے شایان شان بحری فورس تیار کرنے کی سمت میں قدم آگے بڑھایا ہے۔
انھوں نے کہا کہ ہمارے اسلحے اور دفاعی سسٹم سیکڑوں میٹر زمین کے اندررکھے گئے ہیں جو ضرورت پڑنے پر مختصر ترین وقت میں آپریشنل ہوسکتے ہیں۔
سپاہ نیوی کے کمانڈر نے کہا کہ یہ اسلحے اور دفاعی سسٹمس جن کا آج سپاہ پاسداران کے کمانڈر انچیف نے معائنہ کیا، ان میں بحری کروز میزائلوں کے علاوہ دیگر جدید ترین اسلحے بھی شامل ہیں جو ایرانی سائنسدانوں نے ان ٹیکنالوجیوں سے تیارکئے ہیں جو ان کی دسترس میں ہیں۔
انھوں نے بتایا کہ ان میزائلوں کو آپریشنل حالت میں لانے کے لئے ساحلوں پر منتقل کرنے کی ضرورت نہیں ہے۔
ایڈمیرل تنگسیری نے بتایا کہ ان میزائل سٹیز میں موجود دفاعی سسٹموں اور میزائلوں کو ملک کے سیکڑوں کلومیٹر اندر لانچ اور فائرکرکے سمندری اہداف کو نشانہ بنایا جاسکتا ہے۔
انھوں نے ان دفاعی سسٹموں کی مخصوصی توانائیوں اور صلاحیتوں کی طرف اشارہ کرتے ہوئے کہا کہ ان سسٹموں میں منفرد خصوصیات پائی جاتی ہیں جن کی وجہ سے آج ہم دنیا میں بحری کروز میزائلوں کی ٹیکنالوجی میں سب سے آگے ہوگئے ہیں۔
انھوں نے بتایا کہ یہ روایتی طریقے پر کام کرنے والے میزائل نہیں ہیں بلکہ مکمل طور پر گائیڈیڈ اسمارٹ میزائل ہیں جو اپنے اہداف کو اچھی طرح پہچاننے اور نشانہ بنانے کی صلاحیت رکھتے ہیں۔
سپاہ نیوی کے کمانڈر ایڈمیرل علی رضا تنگسیری نے کہا کہ دشمن ہماری توانائیوں کا اندازہ لگانے میں کسی غلط فہمی میں مبتلا نہ ہوں اور ہمارے عزیز عوام بھی جان لیں کہ فرزندان قوم ان کی سربلندی اور سرافرازی کے لئے کسی بھی کوشش سے دریغ نہیں کررہے ہیں۔
آپ کا تبصرہ