ارنا کے ایڈمیرل حبیب اللہ سیاری نے بتایا ہے کہ کل سے شروع ہونے والی ذوالفقار1403 مشترکہ فوجی مشقوں کا سلوگن، " پائیدار بالادستی اور سلامتی" ہے۔
انھوں نے بتایا کہ ان جنگی مشقوں میں بری فوج، ایئر ڈیفنس فورس، ایئر فورس، بحریہ نیز خاتم الانبیا ایئر ڈیفنس ہیڈکوارٹر کے دستے حصہ لیں گے۔
ذوالفقار 1403 مشترکہ فوجی مشقوں کے کمانڈر ایڈمیرل حبیب اللہ سیاری نے بتایا کہ ان فوجی مشقوں کا مقصد، ہر قسم کے زمینی، فضائی اور بحری خطرے سے نمٹنے کے لئے اسلامی جمہوریہ ایران کی دفاعی توانائی اور انسدادی طاقت بڑھانا ہے۔
انھوں نے کہا کہ اگر ہمارے کسی دشمن کے ذہن میں یہ فتور آیا کہ وہ ہماری ارضی سالمیت یا ہمارے زمینی، فضائی اور بحری مفادات کو نقصان پہنچا سکتا ہے تو اس کو اچھی طرح معلوم ہونا چاہئے کہ بہت زیادہ نقصان اٹھائے گا۔
ایڈمیرل حبیب اللہ سیاری نے کہا کہ ان فوجی مشقوں کا ایک مقصد، اس نئی جنگی اور دفاعی حکمت عملی کو آزمانا ہے جو فوج میں ہمارے نوجوانوں نے تیار کی ہے۔
انھوں نے بتایا کہ ہر سال ان جنگی مشقوں کے موقع پر فوج کے اسلحہ خانے میں نئے ہتھیاروں کا اضافہ ہوتا ہے ، اس سال بھی مختلف قسم کے جدید ترین اسلحے جن میں انواع و اقسام کے پن پوائنٹ اور اسمارٹ میزائل بھی شامل ہیں، ان فوجی مشقوں میں آزمائے جائیں گے۔
ایڈمیرل حبیب اللہ سیاری نے بتایا کہ ماضی کے تجربات اور موجودہ خطرات کے پیش نظر اس بار کی یہ جںگی مشقیں اب تک ہونے والی مشقوں سے بالکل مختلف ہوں گی۔
انھوں نے بتایا کہ ان عظیم فوجی مشقوں میں اسلامی جمہوریہ ایران کی فوج کی خلاقیت اور ایجادات کی نمائش بھی کی جائے گی۔
ایڈمیرل حبیب اللہ سیاری نے بتایا کہ ان جنگی مشقوں میں، الیکٹرانک اور سائبر وار کی کارروائیاں بھی انجام دی جائيں گی اور انواع و اقسام کی نئی دفاعی ٹیکنالوجی اور ڈرون طیاروں سے بھی کام لیا جائے گا جو میدان جنگ کا نقشہ تبدیل کرسکتے ہیں۔