ارنا کے مطابق صدرپزشکیان نے منگل 11 فروری کی رات کولمبیا کے صدر گوستاؤ پیترو کے ساتھ ٹیلیفونی گفتگو میں کہا کہ ایران کولمبیا کے ساتھ روابط میں توسیع کے لئے آمادہ ہے اور دونوں ملکوں کے درمیان مختلف علاقائی اور بین الاقوامی میدانوں میں روابط کے فروغ کے حوالے سے اقدامات کا خیر مقدم کرتا ہے۔
انھوں نے لاطینی امریکا کے ملکوں کے ساتھ روابط کے فروغ کو اسلامی جمہوریہ ایران کی خارجہ پالیسی کی ترجیحات میں قرار دیتے ہوئے کہا کہ اس وقت حالات بہت حساس ہورہے ہيں اور امریکا میں ممکنہ طور پر کئے جانے والے فیصلوں سے پوری دنیا کو متعدد مشکلات کا سامنا ہوسکتا ہے۔
صدر پزشکیان نے کہا کہ ان حالات میں دنیا کے آزاد اورخود مختار ملکوں کے درمیان روابط میں فروغ ضروری ہے۔
انھوں نے غزہ سے مظلوم فلسطینی عوام کی اجباری نقل مکانی کے منصوبے کی مخالفت اور مظلوم عوام کی حمایت میں کولمبیا کی حکومت اور عوام کے موقف کو دلیرانہ قرار دیا ۔
انھوں نے کہا کہ غزہ سے فلسطینیوں کو بے دخل کرنے کے منصوبے اور مظلوم فلسطینی عوام کی نسل کشی کی مذمت نیز امن کے عمل کو آگے بڑھانے کی حمایت قابل قدر ہے۔
کولمبیا کے صدر نے بھی اس ٹیلیفونی گفتگو میں اسلامی جمہوریہ ایران کے ساتھ روابط کے فروغ میں دلچسپی کا اظہار کرتے ہوئے کہا کہ دنیا اس وقت بہت ہی حساس صورتحال سے دوچار ہے اور ان حالات میں ہمارے قریبی تعلقات اور باہمی تعاون میں فروغ کی اہمیت بڑھ گئی ہے۔