اسرائیلی فوج نے پانچ مقامات کو چھوڑ کر جنوبی لبنان سے پسپائی اختیار کرلی

ارنا نے العربی چینل کے حوالے سے رپورٹ دی ہے کہ صیہونی حکومت کے ریڈیو اور ٹیلیویژن نے اعلان کیا ہے کہ اسرائیلی فوج ان پانچ علاقوں کو چھوڑ کر جن کا پہلے ہی اعلان کیا تھا، پورے جنوبی لبنان سے نکل گئی ہے۔

 اس سلسلے ميں صیہونی حکومت کے ٹی وی چنیل 24 نے دعوی کیا ہے کہ اسرائیلی فوج نے شہر میس الجبل کو حزب اللہ کے جوانوں سے خالی کرا کے لبنانی فوج کے حوالے کردیا ہے ۔

اس رپورٹ کے مطابق  لبنانی فوج شہر میس الجبل میں داخل ہوگئی ہے اور اسرائیلی فوج  وہاں سے نکل گئی ہے۔

صیہونی فوج نے پیر کو اعلان کیا تھا کہ وہ جنوبی لبنان کے پانچ علاقوں ميں باقی رہے گی۔

غاصب صیہونی حکومت کی فوج نے یہ اعلان ایسی حالت میں کیا ہے کہ لبنانی پارلیمنٹ کے اسپیکر نبیہ بری نے اس سے پہلے ابلاغیاتی اداروں کے نمائندوں سے گفتگو میں کہا تھا کہ امریکیوں نے انہیں اطلاع دی ہے کہ صیہونی فوج، پانچ علاقوں کو چھوڑکر،  ان تمام علاقوں سے جن پر اس نے قبضہ کیا ہے،  18 فروری تک نکل جائے گی۔

 نبیہ بری نے ابلاغیاتی اداروں کے نمائںدوں کو بتایا ہے کہ انھوں نے اپنی طرف سے، اور اسی طرح صدر جوزف عون اور وزیر اعظم نواف سلامی کی طرف سے جنوبی لبنان کے پانچ علاقوں میں صیہونی فوج کے باقی رہنے کی  سخت مخالفت کی ہے۔