اتوار کی رات، ایرانی وزیر خارجہ سید عباس عراقچی نے گیمبیا کے وزیر خارجہ ممدو تنگارا کے ساتھ مقبوضہ فلسطین اور غزہ کی تازہ ترین صورتحال کے حوالے سے ٹیلی فون پر تبادلہ خیال کیا۔
گیمیبا کے پاس اسلامی تعاون تنظیم کی گردشی صدارت کا عہدہ ہے۔
اس ٹیلی فونک گفتگو میں ایرانی وزیر خارجہ نے غزہ کی نسلی تطہیر اور فلسطینیوں کو ان کی سرزمین سے بے دخل کرنے کی خطرناک اور مجرمانہ امریکی صیہونی سازش کی مذمت کرتے ہوئے اس غیر انسانی منصوبے کو تمام بین الاقوامی اصولوں اور قوانین کے منافی قرار دیا اور عالمی برادری پر اس کی سختی سے مخالفت کرنے کی ضرورت پر زور دیا۔
اسلامی تعاون تنظیم کے سیکرٹری جنرل اور عرب اور اسلامی ممالک کے وزرائے خارجہ کے ساتھ ہونے والی مشاورت کا حوالہ دیتے ہوئے عراقچی نے تنظیم کے چیئرمین کی حیثیت سے جلد از جلد اسلامی تعاون تنظیم کے وزرائے خارجہ کا ہنگامی اجلاس منعقد کرنے کی ضرورت پر زور دیا۔
گیمبیا کے وزیر خارجہ نے مسئلہ فلسطین کے حوالے سے ایران کی تشویش کا شکریہ ادا کرتے ہوئے اسلامی تعاون تنظیم کے رکن ممالک کے وزرائے خارجہ کے ہنگامی اجلاس کے انعقاد کے لیے ایرانی وزارت خارجہ کی تجویز کا خیر مقدم کیا۔ انہوں نے اس بات پر زور دیا کہ وہ اس سلسلے میں اسلامی تعاون تنظیم کے دیگر رکن ممالک سے مشاورت کریں گے۔
آپ کا تبصرہ