ارنا نے المنار کے حوالے سے رپورٹ دی ہے کہ حزب اللہ لبنان کے سربراہ شیخ نعیم قاسم نے آج اپنے خطاب میں جنوبی لبنان کی صورتحال پر روشنی ڈالی اور شہید سید حسن نصراللہ نیز شہید سید ہاشم صفی الدین کی تشییع جنازہ کے پروگرام کا اعلان کیا۔
انھوں نے اپنے خطاب میں فلسطینی قوم کو القسام بریگیڈ کے کمانڈر انچیف محمد الضیف اور ڈپٹی کمانڈر مروان عیسی کی شہادت کی تعزیت اور فلسطینی قیدیوں کی آزادی کی مبارکباد پیش کی۔
شیخ نعیم قاسم نے کہا کہ جنگ بندی ميں توسیع کے بعد حکومت لبنان کو ثالث اور جنگ بندی کے نگراں ممالک پر اسرائیلی جارحیتیں اور سمجھوتے کی خلاف ورزیاں رکوانے کے لئے دباؤ ڈالنا چاہئے۔ انھوں نے کہا کہ یہ سمجھوتے کی مخالفت نہیں ہے بلکہ جارحیت ہے اور حکومت لبنان کو اس پر ٹھوس قدم اٹھانا چاہئے۔
شیخ نعیم قاسم نے کہا کہ ہم نے تحمل سے کام لیا تاکہ حکومت لبنان جنگ بندی کے نفاذ کے حوالے سے اپنی ذمہ داریوں پر عمل کرسکے، لیکن اسرائیل سمجھوتے کی خلاف ورزی کررہا ہے اور کسی چیز کو اہمیت نہیں دیتا۔
انھوں نے کہا کہ استقامت ہمارا انتخاب اور راستہ ہے اور ہم مناسب وقت پر اپنے تجزیئے کی بنیاد پر عمل کریں گے۔
شیخ نعیم قاسم نے کہا کہ ہمارے خلاف امریکا اور اسرائيل کی کمان میں بعض ملکوں نیز ایک اندرونی گروہ کی جانب سے شکست کا پروپیگنڈہ کیا جارہا ہے ۔
انھوں نے کہا کہ ہم فتح مطلق کی بات نہیں کرتے، یہ جںگ ہے اس میں ہاراور جیت دونوں ہوتی ہے اور ہماری قوم جانتی ہے کہ بعض معاملات میں وہ کامیاب ہوئی ہے اور بعض میں شکست کا سامناہوا ہے۔
شیخ نعیم قاسم نے کہا کہ ہم اس کامیابی کی بات کرتے ہیں جس کا تعلق ہماری پائیداری، اسرائيلی یلغار کی شکست اور استقامت ختم کرنے میں دشمن کی ناکامی سے ہے۔
حزب اللہ لبنان کے سربراہ شیخ نعیم قاسم نے بتایا کہ شہید سید حسن نصراللہ اور شہید سید ہاشم صفی الدین کی تشییع جنازہ 23 فروری بروز اتوار انا علی عھد یعنی "ہم اپنے عہد کے پابند ہیں" کے سلوگن کے ساتھ انجام پائے گی۔
آپ کا تبصرہ