یمن کے ساحلوں کے قریب ایک اور بحری جہاز کے قریب دھماکے

الجزیرہ نیٹ ورک کے حوالے سے IRNA کی رپورٹ کے مطابق، برطانوی میری ٹائم سیکورٹی کمپنی "Embry" نے یمن کے مغرب میں ایک سمندری حادثے کے رونما ہونے کی اطلاع دی ہے۔

مذکورہ کمپنی نے بتایا ہے کہ المخا کے مغرب میں 27 ناٹیکل میل کے فاصلے پر واقع ایک جہاز کے قریب دو دھماکے ہوئے۔

کچھ گھنٹے قبل المخا کے مغرب میں 19 ناٹیکل میل کے فاصلے پر واقع ایک جہاز کے قریب ایک دھماکے کی اطلاع ملی تھی۔

یہ خبر ایسے وقت میں سامنے آئی ہے جب یمن کی تحریک انصار اللہ کے سربراہ "سید عبدالملک الحوثی" نے جمعرات کے روز ایک بار پھر کہا ہے کہ غزہ پر جارحیت بند ہونے تک اسرائیلی یا اسرائیل جانے والے بحری جہازوں کو نشانہ بنایا جاتا رہے گا۔

انہوں  نے کہا تھا کہ ہماری افواج نے اس ہفتے کے دوران بحیرہ احمر، مکران، بحر ہند اور ام الرعش کی بندرگاہ میں 11 آپریشن انجام دیئے ہیں جن میں 36 میزائیلوں اور ڈرون طیاروں کا استعمال کیا گيا

ارنا کے مطابق گذشتہ مہینوں میں غزہ میں فلسطینی قوم کی مزاحمت کی حمایت میں یمنی فوج نے بحیرہ احمر اور باب المندب میں مقبوضہ علاقوں(اسرائیل)  کی طرف جانے والے متعدد امریکی، برطانوی اور صیہونی بحری جہازوں کو نشانہ بنایا ہے۔

یمنی فوج نے عہد کیا ہے کہ جب تک صیہونی حکومت غزہ پر اپنے حملے بند نہیں کرتی اس وقت تک بحیرہ احمر اور آبنائے باب المندب سے کسی بھی اسرائیلی یا اسرائیل جانے والے بحری جہاز کو گزرنے نہیں دیا جائے گا۔