قفقاز کے خطے میں امن اور استحکام کو اہم سمجھتے ہیں: ایرانی صدر

یہ بات علامہ سید ابراہیم رئیسی نے منگل کے روز آرمینیا کے وزیر اعظم نیکول پاشینیان کے ساتھ ایک نشست میں خطاب کرتے ہوئے کہی۔
اس نشست میں دونوں ممالک کے بعض دیگر اعلیٰ حکام موجود تھے۔
رئیسی نے ایران اور آرمینیا کے درمیان بڑھتے ہوئے تعلقات کا ذکر کرتے ہوئے کہا کہ ایران اور آرمینیا میں موجود مختلف صلاحیتوں کے پیش نظر ضروری ہے کہ دونوں فریق تعلقات کی سطح کو بڑھانے اور تعاون کو وسعت دینے کے لیے ہر ممکن کوشش کریں۔
انہوں نے اس بات پر زور دیا کہ قفقاز کا علاقہ ایران کی تہذیب، تاریخ اور ثقافت کا حصہ ہے، اس خطے میں امن، استحکام اور سکون کو برقرار رکھنا اسلامی جمہوریہ ایران کے لیے اہم ہے۔
آرمینیائی وزیر اعظم، ایک اعلیٰ سیاسی اور اقتصادی وفد کی سربراہی کرتے ہوئے، صدر ابراہیم رئیسی کی سرکاری دعوت پر منگل کو ایران میں داخل ہوئے، اور سوچی میں اپنے آذری اور روسی ہم منصبوں کے ساتھ قفقاز سے متعلق پیش رفت پر اپنے ملک کی سہ فریقی ملاقات کے بارے میں رپورٹ پیش کی۔
انہوں نے پڑوسیوں کے ساتھ تعلقات کو فروغ دینے کے لئے رئیسی کی حکومت کی ترجیح کو تسلیم کرتے ہوئے کہا کہ دونوں ممالک کے مفاد اور دستیاب صلاحیتوں کو دیکھتے ہوئے، انہیں دونوں ریاستوں کے درمیان تعلقات کی موجودہ سطح کو بہتر بنانے کے لیے کام کرنا چاہیے۔
ہمیں اس ٹوئٹر لینک پر فالو کیجئے @IRNA_Urdu